ސީއެންއެން ގެ ބާނީ ޓެޑް ޓަރނަރ އުމުރުން 87 ގައި ނިޔާވެއްޖެ

1980 ވަނަ އަހަރު ސީ.އެން.އެން (CNN) އުފައްދަވައި، ޓީވީ ނިއުސްގެ ދާއިރާއަށް އިންގިލާބީ ބަދަލެއް ގެންނެވި އެމެރިކާގެ މަސްހޫރު ވިޔަފާރިވެރިޔާ އަދި ދަރުމަވެރިޔާ ޓެޑް ޓާނާ، އުމުރުން 87 އަހަރުގައި، 2026 މެއި 7 ގައި ނިޔާވެއްޖެއެވެ.

މަތިމަސް ބަހައްޓަވާ، އެމެރިކާގެ ދެކުނަށް ނިސްބަތްވާ ޓާނާ އަކީ ކާމިޔާބު ކަނޑުދަތުރުވެރިއެއްގެ އިތުރުން ތިމާވެށި ރައްކާތެރިކުރުމަށް ވަކާލާތުކުރެއްވި ބޭފުޅެކެވެ. ކުޅިވަރު ކްލަބްތައްވެސް ހިމެނޭ ބޮޑު ކުންފުންޏެއްގެ ވެރިޔާ ޓާނާ އަވަހާރަވީ "ލޫވީ ބޮޑީ ޑިމެންޝިއާ" (Lewy Body Dementia) ކިޔާ ސިކުނޑީގެ ބައްޔެއްގައި އުޅުއްވާތާ ދުވަސްތަކެއް ވުމަށްފަހުއެވެ.

ސީ.އެން.އެން އަކީ 24 ގަޑިއިރު މެދުނުކެނޑި ހަބަރު ފަތުރާ، ދުނިޔޭގެ މަގުބޫލުކަން ހޯދި ފުރަތަމަ ނެޓްވޯކެވެ. ހާއްސަކޮށް 1990-91 ވަނަ އަހަރުގެ ގަލްފް ހަނގުރާމަ ކަވަރުކުރުމާ އެކު އެ ޗެނަލް ދުނިޔޭގެ ސަމާލުކަމަށް އައެވެ.

Maizan Online

Maizan Online

"ޓެޑަކީ އަހަރެމެން މިއަދު މިތިބި އުސްމިނަށް ވާސިލުވުމުގެ ބިންގާ އެޅުއްވި މާސިންގާ ސަހްސިއްޔަތު" ސީ.އެން.އެން ވޯލްޑްވައިޑްގެ ޗެއާމަން އެންޑް ސީ.އީ.އޯ މާކް ތޮމްޕްސަން ބުދަ ދުވަހު ވިދާޅުވިއެވެ.

ވާދަވެރި ފޮކްސް ނިއުސްގެ ވެރިޔާ ރޫޕަޓް މާޑޮކް ވިދާޅުވީ، ޓާނާ ވަނީ މީޑިއާގެ ސިނާއަތް މުޅިން ބަދަލުކޮށްލައްވާފައި ކަމަށެވެ. ޓާނާ އަކީ 1991 ވަނަ އަހަރު ޓައިމް މެގަޒިންގެ "މޭން އޮފް ދަ އިޔަރ" ގެ ސަރަފުވެސް ހޯއްދެވި ބޭފުޅެކެވެ. އޭނާ ތިން ކައިވެންޏެއް ކުރެއްވިއިރު، އޭގެ ތެރޭގައި މަސްހޫރު އެކްޓްރެސް ޖޭން ފޮންޑާ ހިމެނެއެވެ.

ޓީވީގެ ރަސްކަން

އެމެރިކާގެ މީޑިއާތަކަށް ފާޑުވިދާޅުވާ ރައީސް ޑޮނަލްޑް ޓްރަމްޕްވެސް ވަނީ ޓާނާއަށް ތައުރީފުކުރައްވައި، އޭނާއަކީ "އެންމެ މަތީ ދަރަޖައިގެ އެކަކު" ކަމަށް ސިފަކުރައްވާފައެވެ.

1938 ވަނަ އަހަރު އުފަންވި ރޮބަޓް އެޑްވާޑް "ޓެޑް" ޓާނާ III، އޭނާގެ ބައްޕަގެ މަރުގެ ފަހުން އާއިލީ އިސްތިހާރު ކުންފުންޏާ ހަވާލުވިއެވެ. އެއަށްފަހު ރޭޑިއޯ ސްޓޭޝަންތަކާއި ޓީވީ ޗެނަލްތައް ގަނެ، ވިޔަފާރި ފުޅާކުރެއްވިއެވެ. ސީ.އެން.އެންގެ ކާމިޔާބީއަށްފަހު، އެހެން ގައުމުތަކުގައިވެސް 24 ގަޑިއިރު ހަބަރު ފަތުރާ ޗެނަލްތައް އުފެދެން ފެށިއެވެ. އޭނާގެ ކުންފުނިން ޓީއެންޓީ (TNT)، ޓީބީއެސް (TBS) އަދި ކާޓޫން ނެޓްވޯކް ފަދަ މަގުބޫލު ޗެނަލްތައްވެސް ހިންގިއެވެ.

ކުޅިވަރާއި ދަރުމަވެރިކަން

ކުޅިވަރުގެ ދާއިރާގައިވެސް ޓާނާއަކީ ފާހަގަކޮށްލެވޭ ބޭފުޅެކެވެ. އޭނާ ވަނީ އެޓްލާންޓާ ބްރޭވްސް (ބޭސްބޯލް)، އެޓްލާންޓާ ހޯކްސް (NBA) އަދި އެޓްލާންޓާ ތްރެޝާސް (NHL) ގެ މިލްކުވެރިކަން ހޯއްދަވާފައެވެ. އަދި 1977 ވަނަ އަހަރުގެ އެމެރިކާސް ކަޕް ކާމިޔާބުކުރި ޔޮޓްގެ ކެޕްޓަނަކީވެސް އޭނާއެވެ.

އުމުރުގެ ފަހު ދުވަސްތައް އޭނާ ހޭދަކުރެއްވީ ދަރުމަވެރި މަސައްކަތްތަކުގައެވެ. 1998 ވަނަ އަހަރު، އދ. އަށް އެއް ބިލިއަން ޑޮލަރު ހަދިޔާކުރައްވައި 'ޔޫ.އެން ފައުންޑޭޝަން' އުފެއްދެވިއެވެ. އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވީ، ޓާނާއަކީ ދުރުވިސްނޭ، ދީލަތި ބޭފުޅެއް ކަމަށާއި، އޭނާގެ މަސައްކަތްތަކުން ދުނިޔެއަށް ދާއިމީ ބަދަލުތަކެއް އައިސްފައިވާ ކަމަށެވެ.