ފާއިތުވި ދިހަވަރަކަށް އަހަރު ތެރޭގައި ދިވެހިރާއްޖެ މަގްބޫލުވެފައިވަނީ ހިތްގައިމު އޯވަރ-ވޯޓާ ވިލާތަކާއި، ސާފު ނޫކުލައިގެ ފަޅުތަކާއި، އަދި ހިތްހަމަޖެހުން ހޯދައިދޭ ހިތްގައިމު މަންޒިލެއްގެ ގޮތުގައެވެ. މި ތަސައްވުރުގެ ސަބަބުން އަދިވެސް ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތް ކުރެއެވެ. މިއާއެކު، މިހާރު ރާއްޖެ މިވަނީ މިއަށްވުރެ މާ ފުޅާ އަދި އުންމީދީ އާ އުސްމިންތަކަކަށް އަރާފައެވެ.

ރާއްޖެއަކީ އަބަދުވެސް ދުނިޔޭގެ މުއްސަނދި ފަތުރުވެރިންގެ މެދުގައި އެންމެ މަގްބޫލު އެއް މަންޒިލެވެ. ނަމަވެސް މިހާރު ރާއްޖޭގައި ހިންގާ މަސްރޫއުތަކުގެ ބާވަތްތައް މިވަނީ ބަދަލުވާން ފަށާފައެވެ. ބަލްގަރީ، ނޮބޫ، އަމާން، އެޓްލާންޓިސް އަދި ޓްރަމްޕް ފަދަ ދުނިޔޭގެ ނުފޫޒުގަދަ ބްރޭންޑްތަކުން ދަނީ ރާއްޖޭގައި އާ މަސްރޫއުތަކެއް ހިންގުމަށް ތައްޔާރުވަމުންނެވެ. މީގެ ކުރިން ހަމައެކަނި ފަރުތަކާއި ވެލިގަނޑުތައް އޮތް އެކަހެރި އަތޮޅުތަކުގައި މިހާރު ދަނީ "ބްރޭންޑަޑް ރެސިޑެންސް" (މަސްހޫރު ބްރޭންޑްތަކުގެ އަމިއްލަކުރެވޭ ގެދޮރު) ތަރައްގީކުރެވެމުންނެވެ. މީގެ އިތުރުން، ރާއްޖޭގެ އުތުރުގައި ދާދިފަހުން ހުޅުވުނު ބައިނަލްއަގުވާމީ ބޮޑު އެއާޕޯޓާއެކު ދަތުރުފަތުރުގެ ނިޒާމު ވެސް މިވަނީ މާ ފަސޭހަވެފައެވެ.

ނިމިދިޔަ 2025 ގައި ރާއްޖެއަށް ރެކޯޑް އަދަދަކަށް، އެއީ 2.3 މިލިއަން ފަތުރުވެރިން ޒިޔާރަތްކޮށްފައިވެއެވެ. މީގެ ތެރޭގައި އެންމެ ގިނައިން ފަތުރުވެރިން އައިސްފައިވަނީ ޗައިނާ، ރަޝިޔާ، އިނގިރޭސިވިލާތް، އިޓަލީ އަދި ޖަރުމަނުންނެވެ. 2024 ވަނަ އަހަރު އުފެދުނު ސިޔާސީ ހަމަނުޖެހުންތަކާ ގުޅިގެން ދަށަށްދިޔަ އިންޑިއާ ފަތުރުވެރިންގެ އަދަދު ވެސް މިހާރު ވަނީ ކުރީގެ މިންވަރަށް އިޔާދަވެފައެވެ. ޕްރައިވެޓް ޖެޓްތަކުގައި އަންނަ ފަތުރުވެރިން އިތުރުވެ، ނޫނު އަތޮޅުގައި އޮންނަ މާފަރު އިންޓަނޭޝަނަލް އެއާޕޯޓަކީ މާލޭގެ ވެލާނާ އިންޓަނޭޝަނަލް އެއާޕޯޓަށް މަޑުނުކޮށް، ސީދާ ރިސޯޓުތަކަށް ދާން ބޭނުންވާ މުއްސަނދި ފަތުރުވެރިންގެ މައިގަނޑު ދޮރާއްޓެވެ.

Maizan Online

Maizan Online

އޯވަރވޯޓާ ވިލާތަކަކީ އަދިވެސް ރާއްޖޭގެ ފަތުރުވެރިކަމުގެ މައިގަނޑު ރަމްޒެވެ. ނަމަވެސް، މިހާރު މިއާއެކު ކަނޑުއަޑީގެ ރެސްޓޯރަންޓްތަކާއި، ސުޕަރޔޮޓް ބަނދަރުތަކާއި، ބީޗް ކްލަބްތަކުގެ އިތުރުން އަމިއްލައަށް ގަނެވޭ ގޮތަށް ހުންނަ ބޮޑެތި ވިލާތައް ވެސް ދަނީ ތައާރަފްވަމުންނެވެ. ރާއްޖޭގެ ފަތުރުވެރިކަން މިދަނީ ބަދަލުވަމުންނެވެ. އަދި ކުރިއަށް އޮތް އަހަރުތަކުގައި، ރާއްޖޭގެ އަސްލު ލަގްޒަރީ ސިފަތައް ނުގެއްލި، މި ސިނާއަތް ކިހާވަރަކަށް ފުޅާކުރެވޭނެކަން ހާމަވެގެންދާނެއެވެ.

2026 ވަނަ އަހަރު ހުޅުވޭނެ ކަމަށް ބެލެވޭ އާ ރިސޯޓްތައް

ބަލްގަރީ ރިސޯޓް ރަންފުށި

2022 ވަނަ އަހަރުން ފެށިގެން ތަރައްގީކުރަމުންދާ (Bulgari Resort Ranfushi) ބަލްގަރީ ރިސޯޓް ރަންފުއްޓަކީ އަދިވެސް ރާއްޖޭގައި އެންމެ ގިނަ ބަޔަކު އިންތިޒާރުކުރާ އެއް ރިސޯޓެވެ. ރާ އަތޮޅުގައި، މާލެއިން ފުރައިގެން ސީޕްލޭނެއްގައި 45 މިނެޓުން ދެވޭ ހިސާބުގައި އޮންނަ މި ރިސޯޓަކީ، މިލާން، ދުބާއީ އަދި ބާލީގައި ވެސް ހޮޓާތައް ހިންގާ އިޓަލީގެ މަޝްހޫރު ޖަވާހިރު ބްރޭންޑްގެ މަތީ ފަންތީގެ ސްޓައިލާއި އަގުތަކާ އެއްވަރުގެ ރިސޯޓެކެވެ.

މި ރިސޯޓުގައި 54 ވިލާ ހިމެނެއެވެ. މީގެ ތެރޭގައި 33 ބީޗް ވިލާ، 20 އޯވަރވޯޓާ ވިލާ އަދި ވަކި ހާއްސަ ޕްރައިވެޓް ރަށެއްގައި ހުންނަ ބަލްގަރީ ވިލާއެއް ހިމެނެއެވެ. މި ރިސޯޓް ހުޅުވުމަށް ފުރަތަމަ ރޭވީ 2025 ގައެވެ. ނަމަވެސް ޑިޒައިނަށް ގެނައި ބައެއް ބަދަލުތަކާ ގުޅިގެން ހުޅުވުން ވަނީ 2026 އަށް ފަސްކޮށްފައެވެ. މިތަނުގެ ކެއުންތަކަކީ ހާއްސަ ހައިލައިޓެކެވެ. ތިން މިޝެލިންސްޓާ ހާސިލްކޮށްފައިވާ ޝެފް ނީކޯ ރޮމީޓޯ "އިލް ރިސްޓޯރަންޓް" ބަލަހައްޓާނެއެވެ. އަދި ޝަންހާއީގެ ބަލްގަރީ ހޮޓަލުގައި ހުންނަ ދެ މިޝެލިން-ސްޓާ ހާސިލްކޮށްފައިވާ ޗައިނީޒް ރެސްޓޯރަންޓް "ބާއޯ ލީ ހުއާން" ގެ ގޮތްޕަކާއި، ޖަޕާނީ ކެއުންތަކަށް ހާއްސަ "ހޮސޭކީ" ރެސްޓޯރަންޓް ވެސް މިތަނުގައި ހުންނާނެއެވެ.

މެންޑަރިން އޮރިއެންޓަލް ބޮލިދުއްފަރު ރީފް ރިސޯޓް

ދެކުނު މާލެ އަތޮޅުގެ ބޮލިދުއްފަރު ފަޅުގައި ތިން ފަޅުރަށެއް ހިމެނޭ ގޮތަށް ތަރައްގީކުރާ (Mandarin Oriental Bolidhuffaru Reef Resort) ރިސޯޓު ވަރަށް ބޮޑު ސަރަހައްދެއްގައި ދަނީ ތަރައްގީކުރަމުންނެވެ. ވެލާނާ އިންޓަނޭޝަނަލް އެއާޕޯޓުން ފުރައިގެން ލޯންޗެއްގައި އެންމެ 20 މިނެޓުން ދެވޭ މި ރަށަކީ، މިހާ ބޮޑު ރިސޯޓަކަށް ބަލާއިރު ދަތުރުފަތުރުގެ ގޮތުން އާދަޔާ ހިލާފަށް ފަސޭހަ ތަނެކެވެ.

މި ރިސޯޓުގައި އެއް ކޮޓަރިން ފެށިގެން ހަތަރު ކޮޓަރިއާ ހަމައަށް ހިމެނޭ ގޮތަށް ބީޗް އަދި ވޯޓާ ވިލާ ހިމެނޭހެން ޖުމްލަ 120 ވިލާ ހުންނާނެއެވެ. މީގެ އިތުރުން 12 ސުއިޓް ހިމެނޭ، އިންޑިއާ ކަނޑުގެ އެންމެ ބޮޑު އެއް ސްޕާ ކޮމްޕްލެކްސްގެ މަސައްކަތް މިހާރު ވަނީ ނިމުމަކާ ގާތްވެފައެވެ. މަސައްކަތްތައް ބާރު ދުވެލީގައި ކުރިއަށްދާތީ، ލަފާކުރި ތާރީހަށްވުރެ ކުރިން މި ރިސޯޓު ހުޅުވުމަކީ އެކަށީގެންވާ ކަމެކެވެ.

މޮންޑްރިއަން މޯލްޑިވްސް

ރާއްޖޭގެ ގިނަ ރިސޯޓުތަކަކީ މުޅިން އެކަހެރިކަން ބޭނުންވާ ފަތުރުވެރިންނަށް ހާއްސަ ތަންތަނެވެ. ނަމަވެސް، މޮންޑްރިއަން މޯލްޑިވްސް (Mondrian Maldives) ފަރުމާކޮށްފައިވަނީ މިއަށްވުރެ ދިރުން ހުރި، އަދި އިޖުތިމާއީ ގުޅުންތަކަށް ފުރުސަތު ބޮޑު މާހައުލެއްގެ ގޮތުގައެވެ. އެނިސްމޯރ (Ennismore) ގެ ހޮޓާތަކަކީ ސްޓައިލިޝް ފަރުމާތަކަކާއެކު، މީހުން އެއްވެ ވަގުތު ހޭދަކޮށްލެވޭނެ ބާރުތަކާއި، ރެސްޓޯރަންޓްތަކާއި، އާންމު ސަރަހައްދުތަކަށް ހާއްސަ ސަމާލުކަމެއް ދޭ ބްރޭންޑެކެވެ.

ނޫނު އަތޮޅުގައި ހުޅުވޭ މި ރިސޯޓުގައި މޫދުގައި ހަދާފައިވާ 72 ޕޫލް ވިލާއާއި، އަތިރިމަތީގެ 30 ޕޫލް ވިލާގެ އިތުރުން، އަމިއްލަ ޕްލަންޖް ޕޫލް ހިމެނޭ ތިން ކޮޓަރީގެ ރެސިޑެންސްތައް ހުންނާނެއެވެ. މި ރިސޯޓާއެކު އުފެދޭ ބޮޑު ސުވާލަކީ، އެކަހެރިކަމަށް މަސްހޫރުވެފައިވާ މަންޒިލެއްގައި މޮންޑްރިއަންގެ މި އިޖުތިމާއީ މާހައުލުގެ ކޮންސެޕްޓް ކާމިޔާބުވާނެބާވައެވެ؟

މެލިއާ ވޭލް ލެގޫން މޯލްޑިވްސް

ސްޕެއިންގެ މަސްހޫރު ހޮޓެލް ގްރޫޕެއް ކަމަށްވާ މެލިއާ އިން ރާއްޖޭގައި ހުޅުވާ ފުރަތަމަ ރިސޯޓަކީ އަރި އަތޮޅުގައި ހުޅުވޭ (Meliá Whale Lagoon Maldives) "ވޭލް ލެގޫން" އެވެ. މި ރިސޯޓުގައި ވޯޓާ ވިލާ، ބީޗް ވިލާ އަދި ސަންސެޓް ސުއިޓްތައް ހިމެނޭ ގޮތަށް 100 ވިލާ ހުންނާނެއެވެ. މީގެ އިތުރުން ހަތަރު ރެސްޓޯރަންޓާއި، ސްޕާއެއްގެ އިތުރުން ދެ އިންފިނިޓީ ޕޫލް ހިމެނެއެވެ.

މިއީ ބޮޑެތި މަސްރޫއުތައް ހިންގުމުގެ ތަޖުރިބާހުރި ކުންފުންޏަކުން ހުޅުވާ ފުލް-ސާވިސް ރިސޯޓެކެވެ. މީގެ އިތުރުން މި ރިސޯޓު އޮންނަ ސަރަހައްދަކީ ވެސް މުހިންމު ސަރަހައްދެކެވެ. އަރި އަތޮޅަކީ ފެހުރިހި ބަލަން ފީނުމަށް ރާއްޖޭގެ އެންމެ މަގުބޫލު އެއް ސަރަހައްދު ކަމުން، ހަމައެކަނި ރީތި ގޮނޑުދޮށްތަކެއްގެ އިތުރުން ތަފާތު ތަޖުރިބާތަކެއް ފަތުރުވެރިންނަށް މި ރިސޯޓުން ލިބިގެންދާނެއެވެ.

ރަށް ގިލި މޯލްޑިވްސް

ރަށް ގިލި (Rah Gili Maldives) އަކީ ބައިނަލްއަގުވާމީ ފެސަންތައް ނަކަލު ކުރުމުގެ ބަދަލުގައި ދިވެހިވަންތަކަމަށް އިސްކަންދޭ އާ ބްރޭންޑެއް ކަމަށްވާ "ސިކްސް އެންޑް ސިކްސް ޕްރައިވެޓް އައިލެންޑްސް" ގެ ފުރަތަމަ ރިސޯޓެވެ. ދެކުނު މާލެ އަތޮޅުގައި ހިމާޔަތްކޮށްފައިވާ ކޯމަހުގެ ސެންޗުއަރީ އެއްގެ ކައިރީގައި ހަދާ މި ރިސޯޓުގައި 74 ވިލާ ހުންނައިރު، މީގެ ތެރެއިން 37 ވިލާ ހުންނާނީ މޫދުގައެވެ.

މި ބްރޭންޑްގެ "ރައްޔިތުން" ފަލްސަފާއަކީ ދިވެހި ސަގާފީ ތަރިކައިން އުފެދިފައިވާ އަދި ފަތުރުވެރިންގެ ތަޖުރިބާ ބައްޓަންކޮށްދޭ ކަމެކެވެ. ރަށުގެ ހަރަކާތްތަކުގައި ދިވެހި މަސްވެރިންނާއި، ވަޑިންނާއި، ސަގާފީ ކުޅިވަރުތައް ހުށަހަޅައިދޭ ފަރާތްތައް ބައިވެރިވާނެއެވެ. މިއީ އެހެން ރިސޯޓުތަކާ ހިލާފަށް ފަތުރުވެރިންނަށް ހަގީގީ ދިވެހި ސަގާފަތް ތަޖުރިބާކޮށްލަން ލިބޭނެ ރަނގަޅު ފުރުސަތެކެވެ.

ދޮންމާގާ މޯލްޑިވްސް

"ސިކްސް އެންޑް ސިކްސް" ގެ ދެވަނަ މަސްރޫއު ކަމަށްވާ "ދޮންމާގާ" (Don Maaga Maldives) މިއަހަރުގެ ފަހުކޮޅު ހުޅުވުމަށް ވަނީ ހަމަޖެހިފައެވެ. މިއީ މަތީ ފަންތީގެ (ultra-luxury) މޫދުވިލާތަކެއް ހިމެނޭ ތަނެކެވެ. މީގެ ތެރޭގައި ރާއްޖޭގައި ހުރި އެންމެ ބޮޑެތި ވިލާތައް ހިމެނޭނެއެވެ. އެގޮތުން 10,000 އަކަފޫޓުގެ ބޮޑު ޖާގައަކާއި ބޮޑު ޕޫލެއް ހިމެނޭ ވިލާއެއް ވެސް ހުންނާނެއެވެ. މީގެ އިތުރުން އަމިއްލައަށް ގަނެވޭ ގޮތަށް ޕްރައިވެޓް ރެސިޑެންސްތައް ވެސް ވިއްކުމަށް ވަނީ ހަމަޖެހިފައެވެ.

މި މަސްރޫއުގެ ތެރޭގައި ހިމެނޭ "ހިރިގާ" އަކީ މުޅި ރަށް އެއްކޮށް ކުއްޔަށް ހިފޭ ގޮތަށް (full-island buyout) ހާއްސަކޮށްފައިވާ ޕްރައިވެޓް ރަށެކެވެ. ސިކްސް އެންޑް ސިކްސްގެ ދެ ރިސޯޓަކީ ވެސް ވެލާނާ އިންޓަނޭޝަނަލް އެއާޕޯޓުން ފުރައިގެން ކުރު ލޯންޗު ދަތުރަކުން ދެވޭ ހިސާބުގައި ހުރި ރަށްތަކެކެވެ. މިއީ ދަތުރުފަތުރަށް ގިނަ ވަގުތު ހޭދަވާ ރާއްޖެ ފަދަ ގައުމެއްގައި ލިބޭނެ ވަރަށް ބޮޑު ފަސޭހައެކެވެ.

ވާގަލި މޯލްޑިވްސް، ވިގްނެޓް ކަލެކްޝަން

އައިއެޗްޖީ (IHG) ކުންފުނިން އެކުންފުނީގެ "ވިގްނެޓް ކަލެކްޝަން" (Vaagali Maldives, Vignette Collection) ރާއްޖެއަށް ތައާރަފްކުރަނީ ދެކުނު މާލެ އަތޮޅުގައި 52 ވިލާއާއެކު ތަރައްގީކުރާ ބުޓީކް ރަށެއް ކަމަށްވާ ވާގަލި މޯލްޑިވްސްއާއެކުގައެވެ. މި ރިސޯޓު ހުޅުވުމަށް ހަމަޖެހިފައިވަނީ 2026 ގެ ފަހުކޮޅުއެވެ.

ވިގްނެޓްގެ މަގްސަދަކީ އާންމު ބޮޑެތި ރިސޯޓުތަކާ ހިލާފަށް، ކުދި އަދި އަމިއްލަވަންތަ މާހައުލެއް ފަތުރުވެރިންނަށް ފޯރުކޮށްދިނުމެވެ. މީގެ އެންމެ ބޮޑު ސަމާލުކަމެއް ދެނީ ރަށުގެ ދިރިއުޅުމުގެ ތަޖުރިބާތަކާއި، ދުޅަހެޔޮކަމަށެވެ. އެއާޕޯޓުން ފުރައިގެން އެންމެ 30 މިނެޓުގެ ލޯންޗު ދަތުރަކުން މި ރަށަށް ދެވޭތީ، މިއީ އަލަށް ހުޅުވޭ ރަށްތަކުގެ ތެރެއިން ދަތުރުފަތުރު އެންމެ ފަސޭހަ އެއް ރަށަށް ވެގެންދާނެއެވެ.

އައުރާ މޯލްޑިވްސް

ކަނޑިމާ އަދި ދަ ނޯޓިލަސް ރިސޯޓު ހިންގާ މަސްހޫރު "ޕަލްސް ހޮޓެލްސް އެންޑް ރިސޯޓްސް" އިން އެކުންފުނީގެ އެންމެ ގުދުރަތީ މާހައުލަށް ހާއްސަ ރިސޯޓު، "އައުރާ މޯލްޑިވްސް" (Aura Maldives) 2026 ގެ ފަހުކޮޅު ހުޅުވުމަށް ދަނީ ތައްޔާރުވަމުންނެވެ.

އައުރާ މޯލްޑިވްސް ސަރަހައްދު ކުރެވިފައިވަނީ ޔުނެސްކޯގެ ބަޔޮސްފިއާ ރިޒާވެއްގެ ގޮތުގައި ކަނޑައަޅާފައިވާ، އަދި އެންމަޑި ބަލަން އެންމެ މަސްހޫރު ބ.އަތޮޅުގައެވެ. އެންމަޑިތައް، އެސޮރުމެން ކެއުމަށް އެއްވާ ދުވަސްވަރު، ކައިރީގައި އޮންނަ ހަނިފަރު ބޭޔަށް އެތައް ސަތޭކަ އެންމަޑިއެއް އެއްވެއެވެ. 71 ވިލާގެ މި ރިސޯޓަށް ސީޕްލޭން ނުވަތަ ދަރަވަންދޫ އެއާޕޯޓް މެދުވެރިކޮށް ދަތުރުކުރެވޭނެއެވެ.

ބްރޭންޑެޑް ރެސިޑެންސްތަކާއި ޕްރައިވެޓް ރަށްތައް

ޒަމާނީ އައިލެންޑްސް ރެސިޑެންސަސް

ޒަމާނީ އައިލެންޑްސް (Zamani Islands Residences) އަކީ މިހާރު ރާއްޖޭގައި ކުރިއަށްދާ އެންމެ ބޮޑު މަސްރޫއެވެ. ދެކުނު މާލެ އަތޮޅުގައި އެތައް ރަށެއް ހިމެނޭ ގޮތަށް ތަރައްގީކުރާ މި މަސްރޫއުގައި ރިސޯޓުތަކާއި، ޕްރައިވެޓް ހޯމްތަކާއި، ރެސްޓޯރަންޓްތަކާއި، ވެލްނަސް ސެންޓަރުތަކުގެ އިތުރުން، ރާއްޖޭގެ ފުރަތަމަ ސުޕަރޔޮޓް މެރީނާ ވެސް ހިމެނެއެވެ.

މި މަސްރޫއުގެ ބޮޑުމިނަށް ބަލައި، މިއީ އެކި މަރުހަލާތަކަށް ބަހާލައިގެން ހުޅުވުމަށް ހަމަޖެހިފައިވާ ތަނެކެވެ. މިއީ ހަމައެކަނި ކޮޓަރިއެއް ކުއްޔަށް ހިފުމުގެ ބަދަލުގައި، ރާއްޖޭގައި އަމިއްލަ މިލްކިއްޔާތެއް ބޭނުންވާ، ތަކުރާރުކޮށް ރާއްޖެ އަންނަ މުއްސަނދި ފަތުރުވެރިންނަށް ހާއްސަކޮށްގެން ހަދާ ތަނެކެވެ.

ބަކަރާ ހޮޓެލް އެންޑް ރެސިޑެންސަސް މޯލްޑިވްސް

2027 ވަނަ އަހަރު ހުޅުވުމަށް ހަމަޖެހިފައިވާ ބަކަރާ މޯލްޑިވްސް (Baccarat Hotel & Residences Maldives) ފެތުރިފައިވަނީ ދެކުނު މާލެ އަތޮޅުގެ ގުޅިފައިވާ ފަސް ރަށެއްގެ މައްޗަށެވެ. މި މަސްރޫއުގައި ހޮޓެލް ވިލާތަކުގެ އިތުރުން 62 ޕްރައިވެޓް ރެސިޑެންސް ހިމެނެއެވެ.

ނިއު ޔޯކްގައި ހުންނަ ބްރޭންޑްގެ މައި ހޮޓަލުން ފެންނަ ކްރިސްޓަލް ފަރުމާތައް، ރާއްޖޭގެ މާހައުލާ ގުޅޭގޮތަށް ބަކަރާ މޯލްޑިވްސްއިން ފެނިގެންދާނެއެވެ. މިއީ އަރާމު "ދެވަނަ ގެއެއް" ރާއްޖޭގައި ތަޖުރިބާ ކޮށްލަން ލިބޭނެ ފުރިހަމަފުރުސަތެކެވެ. މިއިން ތަނެއް ގަންނަ ފަރާތަކަކީ ހަމައެކަނި ކޮޓަރިއެއް ބުކްކުރާ ބައެއް ނޫނެވެ، އެއީ ކޮންމެ އަހަރަކު ވެސް ޒިޔާރަތްކުރަން ބޭނުންވާ އަމިއްލަ މަންޒިލެއް އިހްތިޔާރުކުރާ ފަރާތްތަކެވެ.

ނޮބޫ ހޮޓެލް އެންޑް ރެސިޑެންސަސް

ނޮބޫ ބްރޭންޑަކީ ގިނަ ބަޔަކު ދަންނަ ނަމެއް ނަމަވެސް، ރާއްޖޭގައި މި ބްރޭންޑުން ހުޅުވާ ތަން މާ ތަފާތެވެ. މި ރިސޯޓު ހަދަނީ ލާމު އަތޮޅުގެ މުނިޔަފުށީގައެވެ. މާލެއިން ފުރައިގެން އެތެރޭގެ އުދުހުންތަކުން ދާންޖެހޭ މި ދަތުރަކީ ކުޑަކޮށް ދިގު ދަތުރަކަށް ވިޔަސް، ނޮބޫގެ ފޭނުންނަށް މިއީ ހުރަހަކަށް ނުވާނެއެވެ.

ނޮބޫ މޯލްޑިވްސް (Nobu Hotel and Residences) ގައި 26 ބީޗް ވިލާ، 30 މޫދުވިލާ އަދި ވަކިވަކި ޕްރައިވެޓް ރަށްތަކުގައި ހުންނަ 10 "ނޮބޫ އައިލެންޑް އެސްޓޭޓް ރެސިޑެންސް" ހުންނާނެއެވެ. އަދި ހޮޓާ ސިނާއަތަށް ވަނުމުގެ ކުރިން ނޮބޫ ބްރޭންޑް މަޝްހޫރުކޮށްދިން ޖަޕަނީޒް-ޕެރޫވިއަން ކާތަކެއްޗަށް ހާއްސަ "ނޮބޫ ރެސްޓޯރަންޓް" ވެސް ހުންނާނީ ވަކި ހާއްސަ ރަށެއްގައެވެ.

ސަމާނާ އެކްސް އެލީ ސާބް ރެސިޑެންސަސް

ދުބާއީގެ ޑިވެލޮޕަރެއް ކަމަށްވާ ސަމާނާ އިން ދަނީ ލެބަނަންގެ މަސްހޫރު ފެޝަން ހައުސް "އެލީ ސާބް" އާ ގުޅިގެން ރާއްޖޭގައި ބްރޭންޑެޑް ރެސިޑެންސްތަކެއް (Samana x Elie Saab Residences) ހެދުމުގެ މަސައްކަތް ކުރަމުންނެވެ. މި މަސްރޫއުގައި 190 ގެ ހިމެނޭއިރު، މިއީ އެމީހުންގެ އިންވެސްޓްމަންޓްގައި ފެޝަން ބްރޭންޑެއްގެ ނަން ބޭނުންވާ ފަރާތްތަކަށް ހާއްސަ ތަނެކެވެ.

މި ބީޗް ފްރަންޓް ވިލާތަކާއި، މޫދު ބަންގްލޯތަކާއި، ޕޫލްސައިޑް އެޕާޓްމަންޓްތަކުގެ ސަބަބުން، ދުބާއީގެ ރިއަލް އެސްޓޭޓް މޮޑެލް ރާއްޖެއަށް ތައާރަފްވެގެންދާނެއެވެ. މީގެ މައިގަނޑު އަމާޒަކީ ބްރޭންޑްގެ އަގާއި ރަށުގެ ދިރިއުޅުން އެއްކޮށްލުމެވެ.

ޓްރަމްޕް އިންޓަނޭޝަނަލް ހޮޓެލް މޯލްޑިވްސް

"ދާރް ގްލޯބަލް" (Dar Global) އިން ޓްރަމްޕް އިންޓަނޭޝަނަލް ހޮޓެލް މޯލްޑިވްސް (Trump International Hotel Maldives) ހުޅުވުމަށް ރާވާފައިވަނީ 2028 ގެ ފަހުކޮޅުއެވެ. މި މަސްރޫއުގައި މަތީ ފަންތީގެ 80 ބީޗް އަދި ވޯޓާ ވިލާ، ހޮޓެލް ކޮޓަރިތައް، އަދި އަމިއްލައަށް ގަނެވޭ ގޮތަށް ހުންނަ ރެސިޑެންސްތައް ހިމެނެއެވެ.

މި މަސްރޫއަކީ ރާއްޖޭގެ ހޮޓެލް ދާއިރާއަށް ސިޔާސީ ގޮތުން ނުފޫޒުގަދަ ނަމެއް އިތުރުވެގެންދާ ކަމެކެވެ. ޓްރަމްޕްގެ ނަމުގެ ސަބަބުން ބައެއް ފަތުރުވެރިން މިއަށް ސައުގުވެރިވާއިރު، އަނެއް ބަޔަކު މިއާ ދުރަށް ދިއުމަކީ އެކަށީގެންވާ ކަމެކެވެ. މީގެ އިތުރުން މިއީ ދުނިޔޭގެ ފުރަތަމަ "ޓޯކަނައިޒްޑް" ހޮޓެލް މަސްރޫއަށް ވެގެންދާނެއެވެ.

ޗެޑީ މޯލްޑިވްސް

ޗެޑީ ހޮސްޕިޓާލިޓީން "ޖޭއައިއެޗް ގްލޯބަލް އިންވެސްޓްމަންޓްސް" އާ ގުޅިގެން ރާއްޖޭގައި އެކުންފުނީގެ ފުރަތަމަ ރިސޯޓު (Chedi Maldives) ހުޅުވުމަށް ދަނީ ތައްޔާރުވަމުންނެވެ. އާ ބުޓީކް ޗެޑީ ހޮޓަލުގައި މޫދުވިލާތަކާއި، ބީޗް ފްރަންޓް ވިލާތަކުގެ އިތުރުން މަދު އަދަދެއްގެ ބްރޭންޑެޑް ރެސިޑެންސްތައް ވެސް ހުންނާނެއެވެ.

2027 ވަނަ އަހަރަށް ތައްޔާރު ވަމުންދާ...

ރޯޒްވުޑް ރަންފަރު

ރޯޒްވުޑްގެ ފުރަތަމަ ރާއްޖޭގެ ރިސޯޓު، (Rosewood Ranfaru) "ރަންފަރު" ދެކުނު މާލެ އަތޮޅުގައި ހުޅުވުމަށް ހަމަޖެހިފައިވަނީ 2027 ގައެވެ. އެކުންފުނީގެ "އަ ސެންސް އޮފް ޕްލޭސް" ފަލްސަފާގެ ދަށުން، އާންމު ފެންވަރުގެ ލަގްޒަރީ ތަޖުރިބާއެއްގެ ބަދަލުގައި، ކޮންމެ ތަނަކުން ވެސް އެ ރަށެއްގެ އަސްލު މާހައުލާ ގުޅޭ އިހުސާސެއް ކޮށްދޭނެއެވެ.

ރަންފަރުގައި 120 ބީޗް އަދި ވޯޓާ ވިލާ، ރޯޒްވުޑް އެކްސްޕްލޯރާޒް ކްލަބެއް، އަސާޔާ ވެލްބީއިން ސެންޓަރެއް އަދި ހާއްސަ ރެސްޓޯރަންޓްތަކެއް ހުންނާނެއެވެ. ރާއްޖޭގެ މާކެޓަށް ވަނުމަށް ގިނަ ދުވަސްތަކެއް ވަންދެން އިންތިޒާރުކުރި މި ބްރޭންޑަށް މިއީ ވަރަށް ބޮޑު ފިޔަވަޅެކެވެ.

ހަޔަޓް ރީޖެންސީ ސަމަރަފުށި މޯލްޑިވްސް

ހަޔަޓް ގްރޫޕުން ރާއްޖޭގައި ހުޅުވާ ފުރަތަމަ ރިސޯޓު، (Hyatt Regency Samarafushi Maldives) "ސަމަރަފުށި" އުތުރު މާލެ އަތޮޅުގައި ހުޅުވާނީ 2027 ގެ ފަހުކޮޅުއެވެ. މި ރިސޯޓުގައި އަމިއްލަ ޕޫލް ހިމެނޭ 130 ޕްރައިވެޓް ވިލާއާއި ހަތަރު ރެސްޓޯރަންޓް ހުންނައިރު، މީގެ ތެރެއިން އެއް ރެސްޓޯރަންޓަކީ މޫދުއަޑީގެ ރެސްޓޯރަންޓެކެވެ.

ޕާކް ހަޔަޓް ނުވަތަ އަލީލާ ބްރޭންޑްގެ ބަދަލުގައި "ރީޖެންސީ" ބްރޭންޑް އިހްތިޔާރުކުރުމަކީ ފާހަގަކޮށްލެވޭ ބަދަލެކެވެ. މިއިން އެނގެނީ ހަޔަޓް އިން ބޭނުންވަނީ ތަފާތު ފަންތީގެ ފަތުރުވެރިންނަށް އަމާޒުކުރަން ކަމެވެ. ރާއްޖޭގެ މާކެޓަކީ ހަމައެކަނިހަނީމޫން ދަތުރުތަކަށްވުރެ ފުޅާވަމުންދާ މާކެޓަކަށް ވުމުން މިއީ ކާމިޔާބު ފިޔަވަޅަކަށް ވެދާނެއެވެ.

ކަޕެއްލާ މޯލްޑިވްސް

ތަފާތު އަދި އާދަޔާ ހިލާފު ބިނާވެށީގެ (Architecture) ސަބަބުން ފާހަގަކޮށްލެވޭ ކަޕެއްލާ މޯލްޑިވްސް (Capella Maldives) ހުޅުވުމަށް ހަމަޖެހިފައިވަނީ 2027 ގައެވެ. މިއީ އަމިއްލައަށް ހިއްކައިގެން ހަދާފައިވާ ރަށްތަކެއް ކަމަށްވާ "ފާރި އައިލެންޑްސް" (Fari Islands) ގެ ބައެކެވެ.
ޖަޕާނުގެ މަސްހޫރު އާކިޓެކްޓް ކެންގޯ ކޫމާ ފަރުމާކޮށްފައިވާ 57 ވިލާ އަދި މެންޝަންތަކުގައި އަމިއްލަ އިންފިނިޓީ ޕޫލް ހުންނާނެއެވެ.

މިއީ އާންމު ރިސޯޓަކަށްވުރެ ބޮޑަށް ގުދުރަތީ މާހައުލާ ގުޅުވައިގެން ހަދާފައިވާ އާކިޓެކްޗަރަލް އާޓްވޯކެއް ފަދަ ތަނެކެވެ. މީގެ އިތުރުން "އައުރިގާ ސްޕާ އެންޑް ވެލްނަސް" އަދި ތަފާތު 4 ދިމާލަކުން ކެއުންބުއިން ތަޖުރިބާކުރުމުގެ ފުރުސަތު މި ރަށުން ލިބޭނެއެވެ.

2028 އަދި އެއަށްފަހު..

އަމާން މޯލްޑިވްސް

ފޮއްތެޔޮގައި ހަދާ އަމާން އިން މި ރިސޯޓު، (Aman Maldives) ހުޅުވާނެ ސީދާ ތާރީހެއް އަދި އިއުލާނެއް ނުކުރެއެވެ. ނަމަވެސް މި ޕްރައިވެޓް އައިލެޓް މަސްރޫއަށް އޮތް ސައުގުވެރިކަން ދަނީ އިތުރުވަމުންނެވެ. "ކެރީ ހިލް އާކިޓެކްޓްސް" އިން ފަރުމާކުރާ މި ރިސޯޓުގައި 52 ކޮޓަރީގެ ހޮޓަލެއްގެ އިތުރުން، 5 އާއި 10 އާ ދެމެދުގެ ކޮޓަރި ހިމެނޭ 16 "އަމާން ރެސިޑެންސް" ހުންނާނެއެވެ.

ކުންފުނީގެ ސީއީއޯ ވްލަޑް ޑޮރޮނިން ވިދާޅުވި ގޮތުގައި ރާއްޖެއަކީ އެކުންފުނީގެ ރޭވުންތަކުގައި އެތައް އަހަރެއް ވަންދެން އޮތް ތަނެކެވެ. މި ރިސޯޓު ހުޅުވުމާއެކު، މިއީ ރާއްޖޭގައި ހުރުމަށް އެންމެ އަގުބޮޑު އެއް ތަނަށް ވާނެ ކަމަށް ބެލެވެއެވެ.

ކޮރިންތިއާ މޯލްޑިވްސް

ކޮރިންތިއާ މޯލްޑިވްސް (Corinthia Maldives)، ކާފު އަތޮޅުގައި ހުޅުވުމަށް ހަމަޖެހިފައިވަނީ 2028 ގައެވެ. މީގައި ހިމެނޭ 85 ކޮޓަރިއާއި 10 ރެސިޑެންޝަލް ވިލާ ބެހިގެންވަނީ ދެ ރަށެއްގެ މައްޗަށެވެ. އެއީ މައި ރިސޯޓު ހުންނަ ރަށާއި، މަދު ބަޔަކަށް ހާއްސަކޮށްގެން ހަދާ ޕްރައިވެޓް ރަށެކެވެ.
މި ރަށުގެ ބިނާވެށި ފަރުމާކޮށްފައިވަނީ އެންމަޑީގެ ބައްޓަމަށެވެ. އެގޮތުން މައި ޕެވިލިއަން ހަދާފައިވަނީ އެންމަޑީގެ ފިޔަގަނޑުގެ ބައްޓަމަށެވެ. ގިނަ ދުވަހު މަޑުކޮށްލަން، ހަގީގީ އެކަހެރިކަން ބޭނުންވާ، އަދި އެހެން ރަށްތަކާ ތަފާތު ހިތްގައިމު ރަށެއް ހޯދާ ފަރާތްތަކަށް މިއީ ފާހަގަކޮށްލެވޭނެ ތަނެކެވެ.

ނަމޯސް ރިސޯޓް މޯލްޑިވްސް

ނަމޯސް ފުރަތަމަ މަސްހޫރުވީ ގްރީސްގެ މައިކޮނޮސް (Mykonos) ގައި އޮންނަ ބީޗް ކްލަބް މާހައުލާއި، މެޑިޓެރޭނިއަން ކެއުންތަކާއި، ކައިރީގައި އަޅާފައި ހުންނަ ސުޕަރޔޮޓްތަކުގެ ސަބަބުންނެވެ. މިހާރު، ރާއްޖޭގައި ހުޅުވޭ އެކުންފުނީގެ ރިސޯޓު (Nammos Resort Maldives) އިން މި ތަޖުރިބާ ފެންނާނީ ފެންތިއްކެއްގެ ބައްޓަމަށް އޮންނަ ޕްރައިވެޓް ރަށަކުންނެވެ. ނެދަފުށީގައި ތަރައްގީކުރާ މިރިސޯޓުގައި 7 ބްރޭންޑެޑް އައިލެންޑް ވިލާ، 17 ވޯޓާ ވިލާ، 24 ބީޗް ވިލާ، ނަމޯސްގެ ހާއްސަ ރެސްޓޯރަންޓެއް އަދި ވެލްނަސް ސްޕާއެއް ހިމެނެއެވެ.

އެޓްލާންޓިސް ދަ ރޯޔަލް މޯލްޑިވްސް

2029 ވަނަ އަހަރު ހުޅުވުމަށް ހަމަޖެހިފައިވާ އެޓްލާންޓިސް ދަ ރޯޔަލް މޯލްޑިވްސް (Atlantis The Royal Maldives) އަކީ މި ސަރަހައްދަށް އަންނާނެ ބޮޑު ބަދަލެކެވެ. ކާރޒްނަރ ގެ މި މަސްރޫއު ދެކުނު މާލެ އަތޮޅުގެ އެތައް ރަށަކަށް ފެތުރިގެންދާއިރު، ޖުމްލަ 493 ކޮޓަރި ހުންނާނެއެވެ. މީގެ ތެރޭގައި 270 ހޮޓެލް ކޮޓަރި، 223 ވިލާ އަދި މެންޝަންގެ އިތުރުން، އެންމެ ފާހަގަކޮށްލެވޭ ދެ މޫދުއަޑީގެ ވިލާ ހިމެނެއެވެ.

މި ރިސޯޓުގައި ވޯޓާޕާކެއް، އެކުއޭރިއަމްތައް، ސްޕޯޓްސް އެކަޑެމީތައް އަދި ބީޗް ކްލަބްތައް ހުންނާނެއެވެ. މިއީ އާއިލާތަކަށާއި، ބޮޑެތި ގްރޫޕްތަކަށާއި، ގިނަ ހަރަކާތްތަކަށް ލޯބިކުރާ ފަތުރުވެރިންނަށް ހާއްސަކޮށްގެން ހަދާ ތަނެކެވެ. މިއީ ރާއްޖެއަށް އާންމުކޮށް އަންނަ ފަތުރުވެރިންނާ ތަފާތު ބަޔަކަށް އަމާޒުކޮށްގެން ހަދާ ތަނަކަށް ވުމުން، މާކެޓުން މިއަށް އިޖާބަދޭނެ ގޮތް ބަލަން ސައުގުވެރިވާނެއެވެ.

ފިއުޝަން ރިސޯޓް މޯލްޑިވްސް

ފިއުޝަން ހޮޓެލް ގްރޫޕުން "ފިއުޝަން ރިސޯޓް މޯލްޑިވްސް" (Fusion Resort Maldives)، ގދ. އަތޮޅުގައި ހުޅުވުމަށް ރާވާފައިވަނީ 2028 ގައެވެ. ދުޅަހެޔޮކަމަށް އަމާޒުކޮށްގެން ހަދާ މި މަސްރޫއުގައި 185 ވިލާ، ބްރޭންޑެޑް ރެސިޑެންސްތައް، އަދި ބޮޑު ފަޅެއްގެ ވަށައިގެން މޫދުގައި ހަދާފައިވާ ސްޕާ އަދި ރެސްޓޯރަންޓްތައް ހުންނާނެއެވެ. ފިއުޝަން ހޮޓެލް ގްރޫޕަކީ ވިއެޓްނާމްގައި ވަރަށް މަސްހޫރު ކުންފުންޏެކެވެ. އަދި މިއީ އިންޑިއާ ކަނޑުގައި އެކުންފުނިން ހުޅުވާ ފުރަތަމަ ރިސޯޓެވެ.