ދަރިން ރައްކާތެރި ކުރަނީތަ ނުވަތަ ފުރުސަތުތައް ހަނިކުރަނީތަ؟ ވަނީ ކީތް؟ ކުރަންވީ ކީތް؟

ކުދިންނަށް އައު ނުރައްކަލެއް ކުރިމަތިވާހިނދު، މައިން ބަފައިން އަދި ބޮޑެތިމީހުން އަވަސްވެގަންނަނީ އެކަމަށް ހުރަސްތަކެއް އެޅުމަށެވެ. މިއަދު މީސްމީޑިއާ ނުވަތަ ސޯސަލް މީޑިއާ ވެފައިވަނީ އެފަދަ ބޮޑު ނުރައްކަލަކަށެވެ. ނަމަވެސް، އަހަރެމެން މި ކުރަނީ އެކުދިން ރައްކާތެރިކުރުމުގެ މަސައްކަތް ހެއްޔެވެ؟ ނުވަތަ އެކުދިންނަށް އޮތް ފުރުސަތުތައް ހަނިކުރުމަށް އަހަރެމެން އާދަވަނީ ހެއްޔެވެ؟

ބޮޑެތިމީހުންގެ މި ކަންބޮޑުވުންތަކަކީ އަސާސެއް ނެތް ކަންބޮޑުވުންތަކެއް ނޫނެވެ. އދ. ގެ "ކޮންވެންޝަން އޮން ދަ ރައިޓްސް އޮފް ދަ ޗައިލްޑް" ދިރާސާކޮށް ބަލާއިރު، އެއީ ހަމައެކަނި ގެއްލުންތަކުން ރައްކާތެރިވުމަށް ގޮވައިލާ ލިޔުމެއް ނޫނެވެ. އެއީ ކުދިންގެ ބަސް އިއްވުމާއި، މައުލޫމާތު ހޯދުމާއި، އަދި އެކުދިންގެ ހިޔާލު ފާޅުކުރުމުގެ ހައްގުވެސް ކަށަވަރުކޮށްދޭ ލިޔުމެކެވެ.

އެހެންކަމުން، ކުދިން މީސް މީޑިއާ ބޭނުންކުރުން މަނާކުރުމަކީ ހަމައެކަނި ބެލެހެއްޓުމުގެ އުކުޅެއްގެ ގޮތުގައި ބެލެވިދާނެ ހެއްޔެވެ؟ އަޅުގަނޑަށް ފެންނަ ގޮތުގައި މިއީ ބިރުވެރިކަމަކާ ކުރިމަތިލާއިރު ބޮޑެތިމީހުން އަމަލުކުރާ ގޮތާ ބެހޭ ސުވާލެކެވެ.

Maizan Online

Maizan Online

މި ބިރުވެރިކަން އުފެދެނީ އިންޓަރނޭޝަނަލް މައިދާނުގައި ހިނގާ ގަނާ (ބުލީ) ކުރުމާއި، މަކަރާއި ހީލަތް ހެދުމާއި، އަދި ކުދިން ނަހަމަ ގޮތުގައި ބޭނުންކުރުން ފަދަ ނުރައްކާތަކުގެ ސަބަބުންނެވެ. މިކަންކަމުގެ ސަބަބުން ކުދިންގެ ކިޔެވުމަށާއި، ނިދުމަށާއި، އަދި އަމާންކަމުގެ އިހުސާސަށް އަސަރުކުރެއެވެ. ބައެއް ބެލެނިވެރިންނަށް ފޯނާއި މީސްމީޑިއާ މިހާރު ފެންނަނީ ކޮންޓްރޯލުން ނެއްޓިފައިވާ ދުނިޔެއަކަށް ވަދެވޭ ދޮރެއްގެ ގޮތުގައެވެ.

މިފަދަ ހާލަތެއްގައި "މަނާކުރުން" ނުވަތަ "ބޭން" ކުރުމަކީ ވަރަށް ވަރުގަދަ އަދި ތާއީދު ލިބޭ ކަމެކެވެ. މީގެ އިތުރުން، މީސްމީޑިއާ މަންސަ (ޕްލެޓްފޯމް) ތައް ހިންގާ ގޮތް ބަދަލުކުރުމަށް މަޖުބޫރުކުރުމަށްވުރެ ނުވަތަ ސުމޭކު (ޑިޖިޓަލް) ހުނަރުތަކުގެ މަންހަޖެއް ސްކޫލުތަކުގައި ބިނާކުރުމަށްވުރެ "މަނާކުރުން" މާ ފަސޭހައެވެ.

ކުދިންނަށް ގަނާކުރުމާއި، ނަހަމަ ގޮތުގައި ބޭނުންކުރުމާއި، އަދި އޮޅުވައިލުން ފަދަ ކަންކަމުން ރައްކާތެރިކަން ބޭނުންވެއެވެ. ނަމަވެސް އެކުދިންނަށް މައުލޫމާތު ހޯދުމާއި، އުނގެނުމާއި، އަދި މުޖުތަމައުގައި ބައިވެރިވުމުގެ ހައްގުވެސް އޮންނަންޖެހެއެވެ. މި ޒަމާނުގައި ސުމޭކު މާހައުލަކީ ދިރިއުޅުމުގެ އެއްފަރާތެއްގައި އޮތް އެއްޗެއް ނޫނެވެ. އެއީ އުނގެނުމާއި، ރަހުމަތްތެރިކަމާއި، އަދި ދުނިޔެ ތަސައްވަރުކުރުމުގެ މުހިންމު ބައެކެވެ.

އަހަރެމެންގެ ހަމައެކަނި ހައްލަކީ "މަނާކުރުން" ކަމަށްވާނަމަ، ބަހުސް ވަރަށް ހަނިވެގެންދާނެއެވެ. ބޮޑު ސުވާލަކީ: ކުދިންގެ އެހެން ހައްގުތަކަށް އުނިކަން ނުލިބޭނޭހެން އެކުދިން ރައްކާތެރިކުރާނީ ކިހިނެއް ހެއްޔެވެ؟

މިކަމަށްޓަކައި މުޖުތަމައުގައި މަދުވެގެން ތިން ފަށަލައެއްގެ ރައްކާތެރިކަން ބޭނުންވެއެވެ:

ފުރަތަމަ ފަށަލަ: އާއިލާއާއި، ސްކޫލާއި، އަދި ކައިރި މުޖުތަމައެވެ. ބެލެނިވެރިން ހަމައެކަނި ސްކްރީން ވަގުތު ކޮންޓްރޯލްކުރުމުގެ ބަދަލުގައި، އިންޓަރނެޓުން ދިމާވާ ކަންކަން ބިރެއްނެތި ހިއްސާކުރެވޭނެ މާހައުލެއް އުފައްދަންޖެހެއެވެ. ސްކޫލުތަކުން ކުރިމަތިވާ ގަނާކުރުމާއި ފުރައްސާރަކުރުން ފަދަ ކަންކަމަށް ކުރިމަތިލާނެ ނުވަތަ ރިއެކްޓްކުރާނެ ސާފު ނިޒާމެއް އޮންނަންޖެހެއެވެ.

ދެވަނަ ފަށަލަ: ކުދިންގެ އަމިއްލަ ނަފްސު ރައްކާތެރިކުރުމުގެ ގާބިލިއްޔަތު އިތުރުކުރުމެވެ. މިއީ އެންމެ މުހިންމު ބައެވެ. މަކަރާއި ހީލަތް ދެނެގަންނާނެ ގޮތާއި، އަމިއްލަ ސިއްރުތައް ހިފަހައްޓާނެ ގޮތާއި، އަދި އެހީއަށް އެދޭނެ ގޮތް އެކުދިންނަށް ދަސްކޮށްދޭންޖެހެއެވެ.

ތިންވަނަ ފަށަލަ: ސުމޭކު (ޑިޖިޓަލް) ރައްކާތެރިކަމަށްޓަކައި އަވަސް އިޖާބައެއް ދޭނެ ނިޒާމެކެވެ. ކުއްޖެއްގެ ފޮޓޯއެއް ނުވަތަ ވީޑިއޯއެއް ލީކުވެއްޖެނަމަ، އާއިލާއިން ގުޅާނީ ކޮންތާކަށްކަން އެނގެންޖެހެއެވެ. އަދި އެފަދަ ތަކެތި މީސްމީޑިއާ މަންސަތަކުން އަވަހަށް ނައްތައިލެވޭނެ ފަންނީ ގާބިލިއްޔަތުކަން ހުންނަންޖެހެއެވެ.

އަޅުގަނޑު ގަބޫލުކުރާ ގޮތުގައި ކުދިންނަށް އިންޓަރނެޓުގައި ބައެއް ހުދޫދުތައް ކަނޑައެޅުމަކީ ކޮންމެހެން ބޭނުންތެރި ކަމެކެވެ. ނަމަވެސް އެންމެ މުހިންމު ސުވާލަކީ މީސްމީޑިއާ މަނާކުރުމެއް ނޫނެވެ. މުހިންމު ސުވާލަކީ އަޅުގަނޑުމެން ބޭނުންވަނީ ކޮންކަހަލަ ދުނިޔެއެއްގައި ކުދިން ބޮޑުވާން ހެއްޔެވެ؟ އަދި އެ ދުނިޔޭގައި އެކުދިން އެކަނިވެރިވިޔަނުދީ ރައްކާތެރިކަމާއެކު އުޅުމަށް ބޮޑެތިމީހުން ބިނާކުރާނީ ކޮންފަދަ ރައްކާތެރިކަމުގެ ފަށަލަތަކެއް ހެއްޔެވެ؟