ލީޑަރެއްގެ އާ ހިޔާލުތަކަށް ޖަވާބުދާރީވުމަކީ އަނެކުން އަބަދު މަސައްކަތުގައި އުޅެންޖެހޭ ހެން ހީނުވާ ސަގާފަތަކަށް ހެދިދާނެތަ؟

ލީޑަރަކަށް، އާ ހިޔާލުތައް ހިއްސާކުރުމާއި އެއަށް ޖަވާބުދާރީވުމުގެ ވައްޓަފާޅިއާއި އިންތިޒާރުތައް ވަކިކޮށްލައިގެން، "އަބަދު މަސައްކަތުގައި އުޅެންޖެހޭ" ހެން ހީވާ ސަގާފަތެއް އުފެދުނަނުދީ، މަސައްކަތުގެ ބާރުމިން (momentum) މަތީ މިންވަރެއްގައި ހިފެހެއްޓިދާނެއެވެ.

ލީޑަރުންނަށް ގިނަފަހަރަށް ކުރިމަތިލާންޖެހޭ ހަގީގީ ހާލަތްތަކަށް ވިސްނުން ހިންގާލަމާ ހެއްޔެވެ:

އާ އީޖާދީ ހިޔާލުތަކާއި މަސައްކަތުގެ މުހިންމު ފެނުންތެރިކަން (insight)  އަކީ ހެނދުނު 9 އަކުން ހަވީރު 5 އަކަށް ހަމަޖެހިފައިވާ ވަގުތުތަކުގައި އެކަނި އަންނަ ކަންކަމެއް ނޫނެވެ. ނަމަވެސް، ރަސްމީ ގަޑިން ބޭރުގައި މުވައްޒަފުންނާ މުއާމަލާތްކުރުން އާދައަކަށް ވެއްޖެނަމަ، އެއީ މުވައްޒަފުން އަބަދުވެސް މަސައްކަތަށް ތައްޔާރަށް ތިބެންޖެހޭ (constant availability) ސަގާފަތެއް އުފެދުމަށް ނޭނގި ނަމަވެސް މަގުފަހިވާ ކަމެކެވެ. 

Maizan Online

Maizan Online

އޯގަނައިޒޭޝަނަލް ސައިކޮލޮޖީ އާއި މެނޭޖްމަންޓް ސައިންސްގެ ދިރާސާތައް ބުނާގޮތުގައި، ލީޑަރުން ބުނާ ބަސްތަކަށްވުރެ ބޮޑަށް، އެބޭފުޅުންގެ އަމަލުތަކުން ފެންނަ އިސާރާތްތަކަށް މުވައްޒަފުން ވަރަށް ބޮޑަށް ސަމާލުކަންދެއެވެ. ސީދާ ގޮތެއްގައި ޖަވާބުދާރީވާން ނޭންގި ނަމަވެސް، ރަސްމީ ގަޑީގެ ފަހުން ފޮނުވާ މެސެޖުތަކުގެ ސަބަބުން، އެއަށް ޖަވާބުދާރީވުމަށް އޮންނަ، ނުފެންނަ މަޖުބޫރުކަމެއް (implicit pressure) އުފެދެއެވެ.

މީގައި އެންމެ މުހިންމީ އަސާސީ ތަފާތެއް ދެނެގަތުމެވެ:

އަބަދު އާ ހިޔާލުތައް އުފައްދައ ހުށަހެޅުމީ މުވައްޒަފުން އަބަދު މަސައްކަތަށް ހުސްވެގެން ތިބުން ލާޒިމުކުރާ ކަމެއް ނޫނެވެ.

މުވައްޒަފުންގެ ނަފްސާނީ ދުޅަހެޔޮކަމާއި، މިނިވަންކަމާއި، އަދި މަސައްކަތަށް ބަހައްޓާ ސަމާލުކަން ނުގެއްލޭނެހެން، ކޮންމެ ވަގުތަކުވެސް ހިޔާލުތައް ހުށަހެޅޭނެ ނިޒާމުތައް ގާބިލު ލީޑަރުން ބިނާކުރެއެވެ.

ލީޑަރުން "ގަސްދުގައި ނުކުރި ނަމަވެސް" ރަސްމީ ގަޑީގެ ފަހުން މަސައްކަތުގެ ޕްރެޝަރު އުފެދޭ ސަބަބު

މަސައްކަތުގެ މާހައުލުގައި ކުރެވޭ މުއާމަލާތްތަކާ ގުޅޭ ދިރާސާތަކުން ދައްކާގޮތުގައި، ލީޑަރުންގެ އަމަލުތަކަކީ މުވައްޒަފުންނަށް ދެވޭ "ނަމޫނާ އިރުސާދެއް" ކަމުގައި އެމީހުން ބަލައިގަނެއެވެ. މެނޭޖަރަކު ގަވާއިދުން ރޭގަނޑު ދަަންވަރު އީމެއިލް ނުވަތަ މެސެޖު ފޮނުވާނަމަ، މުވައްޒަފުންނަށް ދޭހަވާ ބައެއް ކަންކަމުގެ ތެރޭގައި:

• އަވަހަށް ޖަވާބުދާރީވުމަކީ އަގުވަޒަންކުރެވޭ ކަމެކެވެ.
• މަސައްކަތަށް އިހްލާސްތެރި މުވައްޒަފުންނަކީ ގަޑިން ބޭރުގައިވެސް ސިކުނޑިން މަސައްކަތާ ގުޅިފައި ތިބޭ މީހުންނެވެ.
• ޖަވާބު ނުދީ ހުރުމަކީ މަސައްކަތަށް ސައުގުވެރިކަން ނެތްކަމުގެ ނިސާނަކަށް ވެދާނެ ކަމެކެވެ.
• އަވަހަށް ރިޕްލައިކުރުމަކީ ވަޒީފާގެ ކުރިއެރުމަށް ނުވަތަ އިއްޒަތަށް އަސަރުކުރާ ކަމެކެވެ. (ނަންބަރު މަތިވެ ނުވަތަ ދަށްވާ ކަމެކެވެ.)

މި އިހުސާސް ބޮޑުވަނީ ގިނަ ފަހަރަށް މަގާމުގެ ނުފޫޒުގެ ސަބަބުންނެވެ. ސީނިއަރ ލީޑަރަކަށް އެއީ ހަމައެކަނި ހިޔާލެއް ހިއްސާކޮށްލުން ކަމަށް ވިޔަސް، ޓީމު މެންބަރަކަށް އެއީ އޭނާގެ މަސައްކަތް ވަޒަންކުރާނެ މިންގަނޑެއް ކަމަށް ފެނިދާނެއެވެ.

"ޓެލެޕްރެޝަރު" (Telepressure) — ނުވަތަ މަސައްކަތުގެ މުއާމަލާތްތަކަށް އަވަހަށް ޖަވާބުދާރީވުމަށް އުފެދޭ ނަފްސާނީ ކެކުޅުމާ ބެހޭ ދިރާސާތަކުން ދައްކާގޮތުގައި، މެދުކެނޑުމެއް ނެތި މަސައްކަތާ ގުޅިފައި ހުރުމުން ތިރީގައިވާ ކަންކަން އިތުރުވެއެވެ:

• ސްޓްރެސް (ނަފްސާނީ ބުރަ)
• ނިދި މަދުވުން ނުވަތަ ނިދި ނައުން
• ބަރންއައުޓް (މަސައްކަތުން މުޅިން ވަރުބަލިވުން)
• ވިސްނުމުގެ ބާރު ދެރަވުން
• މަސައްކަތާއި އާއިލީ ދިރިއުޅުމުގެ ފުށުއެރުން

އަނެއްކޮޅުން، ވަގުތުން ވަގުތަށް ކުރެވޭ ފިކުރުތައް ހިއްސާކުރުން މުޅިން ހުއްޓުވާލައި، މުއައްސަސާތައް ލަސްވެ، ބިއުރޮކްރެޓިކް ވެ، އީޖާދީ ކަންކަމާ ދުރުވެއެވެ. އެހެންކަމުން، އަމާޒަކީ ހިޔާލުތައް އައުން ހުއްޓުވުމެއް ނޫނެވެ. އަމާޒަކަށް ވާންވީ، އެ ހިޔާލުތައް އައުމަކީ މުވައްޒަފުން އަބަދު ތައްޔާރަށް ތިބެންޖެހޭ ޕްރެޝަރަކަށް ވިޔަނުދިނުމެވެ.

މަސައްކަތުން ދުރުވެލުމުގެ ސައިންސާއި އޭގެ މުހިންމުކަން

މަސައްކަތުގެ ދުޅަހެޔޮކަމާ ބެހޭ ގިނަ ދިރާސާތަކުން ދައްކާގޮތުގައި، އަރާމުކުރާ ވަގުތަކީ އިހްތިޔާރީ ކަމެއް ނޫނެވެ. މަސައްކަތުގެ ފެންވަރު ހިފެހެއްޓުމަށްޓަކައި، މަސައްކަތުގެ ވިސްނުމާ މުޅިން ވަކިވެލާނެ ވަގުތު މުވައްޒަފުންނަށް ބޭނުންވެއެވެ.

ދިރާސާތަކުގެ މުހިންމު ހޯދުންތައް:

• އަރާމުކުރާ ވަގުތު ނުލިބޭނަމަ ވިސްނުމުގެ ގާބިލުކަން ދަށަށްދިއުން
• އުފެއްދުންތެރި ހިޔާލުތައް (Creativity) ގިނައިން އަންނަނީ މަސައްކަތުން ދުރުވެ، އަރާމުކޮށްލާ ވަގުތުތަކުގައިކަން
• މެސެޖުތަކަށް ޖަވާބު ނުދިން ކަމުގައިވިޔަސް، މެސެޖެއް އަތުވެދާނެ ކަމަށް ބަލައިގެން ތިބޭ ތިބުމަކީ ސިކުނޑިއަށް ބޮޑު ބުރައެއް އުފުލަންޖެހޭ ކަން
• ބަރންއައުޓް ވުމާ އެންމެ ބޮޑަށް ގުޅިފައިވަނީ މަސައްކަތުގެ ބޯޑަރުތައް (އިންތައް) ކަނޑައެޅުމުގެ ބާރު މުވައްޒަފަށް ނެތުންކަން

މީގެ މާނައަކީ، ރޭގަނޑު މެސެޖުތައް ޗެކްކުރަން ޖެހޭކަމުގެ އިހުސާސް އޮންނަ ސަގާފަތެއްގެ ސަބަބުން ތިރީގައިވާ ކަންކަން ބަލިކަށިވެ ދަށަށް ދިއުމެވެ:

• ދިގު މުއްދަތުގެ އުފެއްދުންތެރިކަން
• އީޖާދީ މަސައްކަތުގެ ފެންވަރު
• މުވައްޒަފުން ވަޒީފާގައި ދެމިތިބުން
• މުވައްޒަފުންގެ ހިތްހަމަޖެހުން
• ނިންމުންތައް ނިންމުމުގެ ފެންވަރު

ހައިރާންވާންޖެހޭ ކަމަކީ، "އަބަދު މަސައްކަތުގައި" އުޅޭ ސަގާފަތްތަކުގެ ސަބަބުން، ދިގު މުއްދަތަށް ބަލާއިރު އީޖާދީ ކުރިއެރުންތައް މަދުވާކަމެވެ.

ކާމިޔާބު ލީޑަރުން ކަންކަން ކުރާ ތަފާތު ގޮތްތައް

1. ހިޔާލު ރައްކާކުރުން" އަދި "އަމަލުކުރަން އެންގުން" ވަކިކުރުން

މޮޅު ލީޑަރުން އާ ހިޔާލުތައް އަންނަ ވަގުތު އެ ނޯޓުކޮށް ރައްކާކުރެއެވެ. ނަމަވެސް އެއަށް އަމަލުކުރަން އަންގާ ވަގުތު ފަސްކުރެއެވެ. މިސާލަކަށް:

• އަމިއްލަ ނޯޓުތަކެއް ލިޔުން
• ޑްރާފްޓް އީމެއިލް ބޭނުންކުރުން
• ޕްލޭނިންގ ސިސްޓަމެއްގެ "ބެކްލޮގް" އަށް ހިޔާލުތައް އިތުރުކުރުން
• ރަސްމީ ގަޑިއަށް މެސެޖުތައް ޝެޑިއުލްކުރުން

މީގެ ސަބަބުން ލީޑަރުގެ އީޖާދީ ރޫހަށް ހުރަހެއް ނޭޅި، އެހެން މީހުންނަށް ކުއްލި މަޖުބޫރުކަމެއް ނުދީ ކަންކަން ކުރިއަށް ގެންދެވެއެވެ. މީގެ މުހިންމު ތަފާތަކީ: ޓީމު މެންބަރުން ރަސްމީ ގަޑިން ބޭރުގައި ނަފްސާނީ ގޮތުން ހާޒިރުވެ ތިބެން ނުޖެހި، ލީޑަރުގެ އުފެއްދުންތެރިކަން ދެމެހެއްޓުމެވެ.

2. ބުނާ ބަހަށްވުރެ އަމަލަށް އިސްކަންދޭކަން ދެނެގަތުން

ގިނަ ލީޑަރުން ބުނެއެވެ: "މިރޭ މީގެ ޖަވާބު ދޭނެ ކަމެއް ނެތެވެ." ނަމަވެސް މުވައްޒަފުން ގިނަފަހަރަށް ބަލަނީ އެ ބަހަކަށް ނޫނެވެ، ލީޑަރުގެ އަމަލުތަކަށެވެ. ލީޑަރުގެ ފަރާތުން އަންނަނިވި ކަންކަން ފެންނަނަމަ،  މިސާލަކަށް ދަންވަރު މެސެޖު ފޮނުވުން، ކޮންމެ ގަޑިއެއްގައިވެސް ވަގުތުން ޖަވާބުދިނުން، އަވަހަށް ޖަވާބުދޭ މީހުންނަށް ތައުރީފުކުރުން، އަދި ލަފާނުކުރެވޭ ގޮތަށް ކަންކަން ކުއްލި ކަންކަމަށް ހަދަންޏާ، މުވައްޒަފުންނަށް ދަސްވާނީ އަބަދު ތައްޔާރަށް ހުރުމަކީ މުހިންމު ކަމެއް ކަމުގައެވެ.

ހަގީގަތުގައިވެސް ދުޅަހެޔޮ އިންތަކެއް ބޭނުންވާ ލީޑަރަކު ތިރީގައިވާ ކަންކަން އަމަލުން ދައްކަންޖެހެއެވެ:

• މެސެޖު ފޮނުވުން ފަސްކުރުން
• ކުއްލި ނޫން ކަންކަން ޝެޑިއުލްކުރުން
• ޖަވާބު ލިބުން ލަސްވުމާމެދު ހިތްހަމަޖެހުން
• "އޮފްލައިން" ވަގުތަށް އިހުތިރާމްކުރުން

3. އީޖާދީ ކަންކަމަށް ލަފާކުރެވޭ ނިޒާމުތަކެއް އުފެއްދުން

ކާމިޔާބު ޓީމުތަކުގެ ދިރާސާތަކުން ދައްކާގޮތުގައި، މުއާމަލާތްކުރާނެ ވަކި ނިޒާމެއް އޮތުމުން ސްޓްރެސް ކުޑަވެ، އިތުބާރު ބޮޑުވެއެވެ. ކުއްލި ކުއްލިއަށް މެސެޖު ފޮނުވުމުގެ ބަދަލުގައި، އަންނަނިވި ކަންކަމުން ވާނެ ފައިދާ ބޮޑުކަމަށް ބެލެއެވެ:

1. ހަފުތާއަކު އެއްފަހަރު ކުރިއެރުންތައް މުރާޖައާކުރުން
2. "ރެޓްރޯސްޕެކްޓިވް" ބައްދަލުވުންތައް ބޭއްވުން
3. ހިޔާލުތައް ހުށަހަޅާނެ ވަކި އޮނިގަނޑެއް އޮތުން
4. އޭސިންކްރޮނަސް (ވަގުތުން ޖަވާބުދޭން ނުޖެހޭ) އައިޑިއާ ބޯޑުތައް ބޭނުންކުރުން

މީގެ ސަބަބުން މުވައްޒަފުންނަށް ނަފްސާނީ ރައްކާތެރިކަން ލިބެއެވެ. ސަބަބަކީ އެމީހުންގެ ހިޔާލުތައް ގެއްލިގެން ނުދާނެކަމާއި، އެއަށް ފުންކޮށް ވިސްނާނެ ވަގުތު އޮންނާނެކަން އެނގޭތީއެވެ.

4. ކަންކަމުގެ އަވަސްމިން (Urgency) ސާފުކޮށް ކަނޑައެޅުން

މަަސައްކަތުގެ މާހައުލުގައި ދިމާވާ އެންމެ ބޮޑު އެއް މައްސަލައަކީ ކަމެއްގެ މުހިންމުކަން ނުވަތަ (ވާންޖެހޭ) އަވަސްމިން ނޭނގުމެވެ. ކޮންމެ މެސެޖަކީވެސް ވަގުތުން ބަލަންޖެހޭ އެއްޗެއް ކަމަށް ހީވާނަމަ، މުވައްޒަފުން ތިބޭނީ އަބަދުވެސް ނުތަނަވަސްކަމެއްގައެވެ. ދުޅަހެޔޮ މާހައުލުތަކުގައި މިކަންކަން ދުރާލައި ކަނޑައަޅާފައި ހުރެއެވެ:

• ކުއްލި ހާލަތަކީ ކޮބައިކަން
• އަވަސް މުއާމަލާތްތަކަށް ބޭނުންކުރާނީ ކޮން ވަސީލަތެއްކަން
• ޖަވާބުދޭންޖެހޭ ވަގުތުތައް
• މަޑުކުރެވިދާނެ ކަންކަމަކީ ކޮބައިކަން (މިސާލަކަށް: ޗެޓް އެޕް = އާދައިގެ މުއާމަލާތް، ފޯނު ކޯލް = ކުއްލި މުހިންމު ކަމެއް، އީމެއިލް = އަވަސް ނޫން ކަންކަން)

5. އަބަދު ހާޒިރުވެ ހުރުމުގެ ބަދަލުގައި ނަތީޖާއަށް އިނާމުދިނުން

ބައެއް ސަގާފަތްތަކުގައި ނޭނގި ނަމަވެސް "ދެއްކުންތެރި" އަވަސްމިނަށް ސަމާލުކަން ދެވެއެވެ: ވަގުތުން ރިޕްލައިކުރުން، ރޭގަނޑު އޮންލައިންވުން، ޗުއްޓީގައި އުޅެމުން ޖަވާބުދިނުން ފަދަ ކަންކަމެވެ. މީގެ ސަބަބުން މަސައްކަތުގެ ފުންމިނާއި ފެންވަރު ދަށަށްދެއެވެ. މޮޅު ލީޑަރުން އިނާމުދީ އަގުވަޒަންކުރަނީ:

• ނިންމުންތަކުގެ ފެންވަރު
• ކަންކަމުގެ އިސްކަންދޭ ތަރުތީބު
• ދެމެހެއްޓެނިވި ގޮތެއްގައި މަސައްކަތް ކުރުން
• ޓީމުގެ އެއްބާރުލުން

6. ނަފްސާނީ ރައްކާތެރިކަން (Psychological Safety) ކަށަވަރުކުރުން

މީގެ މާނައަކީ، ތިރީގައިވާ ކަންކަން ކުރުމުގައި މުވައްޒަފުން ބިރުނުގަތުމެވެ:

1. އަމިއްލަ ވަގުތުގެ އިންތައް ކަނޑައެޅުން
2. ސުވާލުކުރުން
3. ހިޔާލު ތަފާތުވުން
4. އަބަދު މަސައްކަތަށް ހުސްވެގެން ނުތިބުން

ލީޑަރުން މި ރައްކާތެރިކަން ބިނާކުރަނީ ގަޑިން ބޭރުގައި ޖަވާބުދިނުން ލަސްވުމުން އެކަމަށް ފިޔަވަޅު ނޭޅުމާއި، އަމިއްލައަށްވެސް ދުޅަހެޔޮ އިންތަކަށް އިހުތިރާމްކޮށްގެންނެވެ.

7. ދުނިޔޭގެ އެކި ހިސާބުތަކުގައި މަސައްކަތްކުރުމުގެ އުނދަގޫތައް ދެނެގަތުން

އެކި ގައުމުތަކަށް ބެހިފައިވާ ޓީމުތަކުގައި މި މައްސަލަ ބޮޑެވެ. ސަބަބަކީ ކޮންމެވެސް އެކަކު ކޮންމެވެސް ތަނެއްގައި އަބަދުވެސް އޮންލައިންކޮށް ހުންނާނެތީއެވެ. މީގެ ހައްލަކީ މުއާމަލާތް ހުއްޓާލުމެއް ނޫނެވެ، ނަމަވެސް "ޖަވާބުދިނުން ލަސްވުމަކީ އާދައިގެ ކަމެއް" ކަމަށް ބަލައިގަތުމެވެ.

• މި މެސެޖު ކިޔާނީ ތިބާގެ ރަސްމީ ގަޑީގައެވެ.
• ރަސްމީ ގަޑިން ބޭރުގައި ހަނު ހުރުމަކީ ބޭނުންވާ ގޮތެވެ.
• އަވަސް ކަމެއްނަމަ އެކަން ސާފުކޮށް ބުނެވޭނެއެވެ.

8. "އީޖާދީ ނުތަނަވަސްކަން" (Innovation Anxiety) އިން ސަލާމަތްވުން

ބައެއް ލީޑަރުންނަށް ނޭނގި ނަމަވެސް އުފެއްދޭ މާހައުލަކީ، ކޮންމެ ހިޔާލަކީ ވަގުތުން ކުރަންޖެހޭ މަސައްކަތެއް ކަމަށް މުވައްޒަފުންނަށް ހީވުމެވެ. މީގެ ސަބަބުން ސަމާލުކަން ކުޑަވެ، މަސައްކަތުގެ ހަމަޖެހުން ގެއްލޭ ގޮތް ވެއެވެ. ގާބިލު ލީޑަރުން ކަންކަން ތަރުތީބުކޮށް، ކުއްލި ކުއްލިއަށް ބަދަލުވާ ބަދަލުތައް މަދުކުރެއެވެ.

ހަމަހަމަކަން ހިފަހައްޓާ ލީޑަރެއްގެ އަމަލުތައް ހުންނާނެ ގޮތް

ދުުޅަހެޔޮ ލީޑަރަކު ކުރުން މުހިއްމު އަދި ހިފަހައްޓަން ޖެހޭ އަހުލާގު:

• ހިޔާލެއް އަންނަ ކޮންމެ ވަގުތަކު އެ ރައްކާކުރުން
• މުއާމަލާތްތައް ރަސްމީ ގަޑިއަށް ޝެޑިއުލްކުރުން
• ރަސްމީ ގަޑިން ބޭރުގައި ގުޅާނީ ހަމައެކަނި ކުއްލި ހާލަތްތަކުގައި
• ދެމެހެއްޓެނިވި މަސައްކަތަށް ތައުރީފުކުރުން

މީގެ ސަބަބުން އުފެދޭ ސަގާފަތަކީ އީޖާދީ، ޒިންމާދާރު، ނަފްސާނީ ގޮތުން ދުޅަހެޔޮ، އިތުބާރު ބޮޑު، އަދި ބަރންއައުޓްވުން ކުޑަ ސަގާފަތެކެވެ. ހަރުދަނާ މަސައްކަތުގެ މާހައުލެކެވެ.

އަމަލީ އުސޫލެއް

މަސައްކަތު މާހައުލެއްގައި އޮންނަންޖެހޭ އެންމެ ސާފު އުސޫލަކީ، ހިޔާލުތައް ކޮންމެ ވަގުތަކުއައި ކަމުގައިވިޔަސް، ޓީމުގެ ސަމާލުކަން ބޭނުންވަނީ، ކުއްލި މުހިންމު ކަމެއް ކަމަށް ސާފުކޮށް ބުނެފައި ނުވާހާ ހިނދަކު، އެއްބަސްވެފައިވާ ރަސްމީ ގަޑިތަކުގައެވެ.

މުއައްސަސާގެ ހަލުވިކަމާއި، އިންސާނާގެ ދުޅަހެޔޮކަމާއި ދެކަންތަކުގައި ހުރި ފަރަގު ދެނެގަނެ ބަޔާންކޮށް، ނިޒާމީ ގޮތެއްގައި ހިފެހެއްޓޭނަމަ — މި ދެކަންތައްވެސް ފުރިހަމައަށް ރައްކާތެރިކުރެވުމުގެ ކަށަވަރުކަން ބޮޑެވެ. އެންމެ މޮޅު ލީޑަރުންނަކީ، އިންތައް ހިފެހެއްޓުމަށްޓަކައި އީޖާދީ ކަންކަން ދޫކޮށްލާ ބައެއް ނޫނެވެ. އެއީ އީޖާދީ ކަންކަމާއި އިންތައް އެކުގައި ކުރިއަށްދާނެ ނިޒާމުތައް ބިނާކުރާ މީހުންނެވެ.