ޓްރަންޕާއެކު މަސްކާއި ޓިމްގޮސް ޝީ އާއި ކުރީ އުއްމީދީ މަސްވަރާ ތަކެއް: ޓްރަންޕު

މި މޭމަހު 14 ވަނަ ދުވަހު، އެމެރިކާގެ ވިޔަފާރިވެރިން ކަމަށްވާ ޓެސްލާ/އެކްސްގެ އިލޮން މަސްކް އާއި އެޕަލް ކުންފުނީގެ ވެރިޔާ ޓިމް ކުކް ހިމެނޭ ގޮތަށް، ޓްރަންޕާއި ޗައިނާގެ ރައިސް ޝީ، ދެގައުމުގެ އިސްވެރިންނާއި ވިޔަފާރިވެރިން ބައިވެރިވެވަޑައިގެންނެވި ބެއިޖިންގްގެ ކުލަގަދަ ޖާފަތެއްގައި ވާހަކަދައްކަވަމުން، އެމެރިކާގެ ރައީސް ޑޮނަލްޑް ޓްރަމްޕް ވަނީ ޗައިނާގެ ރައީސް ޝީ ޖިންޕިންގް އާއެކު ބޭއްވުނު މަސްވަރާތަކަކީ "އުއްމީދީ" (extremely positive) ވާހަކަތަކެއް ކަމަށް ވިދާޅުވެ ތައުރީފުކުރައްވާފައެވެ.

ދުނިޔޭގެ ސަމާލުކަން ހުއްޓިފައިވާ މި ސަމިޓުގެ ފުރަތަމަ ފުރިހަމަ ދުވަސް ދެ ވެރިން ނިންމަވާލެއްވީ، ޗައިނާގެ ވެރިރަށް ބެއިޖިންގްގެ ޓިއަނަންމެން ކިޔާ މައިދާނާ އިންވެގެން ހުންނަ މަސްހޫރު މާލަމެއް ކަމުގައިވާ "ގްރޭޓް ހޯލް އޮފް ދަ ޕީޕަލް" ގައި ރަތްދޫލަ ފަތުރާފައިވާ ޖާފަތުންނެވެ.

މީގެ އިތުރުން، އަންނަ ސެޕްޓެމްބަރު މަހުގެ 24 ވަނަ ދުވަހު ވައިޓް ހައުސްއަށް ޒިޔާރަތްކުރެއްވުމަށް ރައީސް ޝީ އަށާއި އެމަނިކުފާނުގެ އަނބިކަނބަލުން ޕެންގް ލީޔުއާންއަށް ދައުވަތު އަރުވާފައިވާނެ ކަމަށްވެސް ޓްރަމްޕް ވިދާޅުވިއެވެ.

Maizan Online

Maizan Online

ދެ ވެރިން ވަޑައިގަތުމުގެ ކުރިން ދެއްކި ލައިވް މަންޒަރުތަކުން ފެނުނީ ނުހަނު އުފާވެރި މާހައުލެކެވެ. ޗައިނާގެ ވެރިކަންކުރާ ކޮމިއުނިސްޓް ޕާޓީގެ އިސް ބައެއް ބޭފުޅުން ޓްރަމްޕްގެ ސަރުކާރުގެ މެންބަރުންނާ ހިނިތުންވުމާއެކު ވާހަކަދައްކަވަން ތިއްބެވި މަންޒަރު ފެނުނެވެ. އަދި ސަގާފީ ރަތް ހެދުމުގައި ތިބި ސާވަރުން (ސުފުރާހާދިމުން) ކުލަކުލައިގެން ޒީނަތްތެރިކޮށްފައިވާ މޭޒުތަކުގެ މެދުގައި ހަލަބޮލިކޮށް އުޅުނުއިރު، ބައިވެރިންނަށް، ބެއިޖިންގް ރޯސްކުރި އަސްދޫނި، ޕޯކް ބަންސް (އޫރުމަސް އެޅި ބަނަސް) އަދި ތިރާމިސޫ ފަދަ ކާތަކެތިން މަރުހަބާ ކިޔާފައިވެއެވެ.

މި އުފާވެރި މާހައުލު ފެނުނު ނަމަވެސް، ދުނިޔޭގެ އެންމެ ބޮޑު ދެ އިގްތިސޯދުގެ މެދުގައި އޮތް ބޮޑެތި ދެބަސްވުންތައް އަދިވެސް އެބަހުއްޓެވެ.

ވޮޝިންގްޓަނާއި ބެއިޖިންގްއާ ދެމެދު ވިޔަފާރިއާއި، ޓެކްނޮލޮޖީ އަދި ތައިވާނުގެ މައްސަލައިގައި ޒަމާނުއްސުރެ ބޮޑެތި ދެބަސްވުންތަކެއް ހިނގަމުންދެއެވެ.

ހާއްސަކޮށް، ފެބްރުއަރީ 28 ގައި އެމެރިކާ އާއި އިސްރާއީލުން އީރާނާއެކު ހަނގުރާމަ ފެށިފަހުން މި ގުޅުން އިތުރަށް ވަނީ ގޯސްވެފައެވެ. ސަބަބަކީ އީރާނަކީ އޭގެ ތެލުގެ ވިޔަފާރީގައި އެންމެ ބޮޑަށް ޗައިނާއަށް ބަރޯސާވާ ގައުމަށް ވާތީއެވެ.

ޖާފަތުގައި ވާހަކަދައްކަވަމުން ރައީސް ޝީ ވިދާޅުވީ، ޗައިނާގެ ކުރިއެރުމަކީ ޓްރަމްޕްގެ ސިޔާސީ ޝިއާރު ކަމަށްވާ "މޭކް އެމެރިކާ ގްރޭޓް އެގެއިން" (ގަދަ ގައުމަކަށް އެމެރިކާ އަނެއްކާވެސް ހެދުން) އާއެކު އަތާއަތްގުޅާލައިގެން ކުރިއަށްދެވިދާނެ ކަމެއް ކަމަށެވެ. އެހެންނަމަވެސް، ތައިވާނުގެ މައްސަލައިގައި އެމެރިކާއިން ނިންމާ ނުބައި ނިންމުންތަކެއްގެ ސަބަބުން ދެގައުމުގެ މެދުގައި ބޮޑު "ކުރިމަތިލުމަކަށް" ހިނގައިދާނެ ކަމުގެ އިންޒާރު ޝީ ވަނީ މާކުރިން ޓްރަމްޕަށް ދެއްވާފައެވެ.

ބުދަ ދުވަހުގެ ހަވީރު ބެއިޖިންގްއަށް ވަޑައިގެންނެވި ފަހުން ޓްރަމްޕް ތައިވާނުގެ މައްސަލައާ ބެހޭގޮތުން އެއްވެސް އެއްޗެއް ވިދާޅެއްނުވެއެވެ. އަދި ޝީ އާއެކު ބޭއްވި މަސްވަރާތަކަށްފަހު ނޫސްވެރިން، އެ މައްސަލައިގައި ކުރި ގިނަ ސުވާލުތަކަށް އޭނާ ވަނީ ޖަވާބުނުދެއްވައި ދޫކޮށްލައްވާފައެވެ.

ޗައިނާގެ އެއްބާރުލުން ހޯދުމަށް ޑޮނަލްޑް ޓްރަމްޕް ކުރި އެޒިޔާރަތުން، އަމަލީ ގޮތުން ނެރެވުނު ނަތީޖާއަށްވުރެ ބޮޑަށް ފެނިގެންދިޔައީ ރަމްޒީ ސިފަތަކެކެވެ. އޭނާ އާއި ޝީ ޖިންޕިންގްއާ ދެމެދު ވިޔަފާރީގެ ނުތަނަވަސްކަމާއި، ބައިނަލްއަގްވާމީ ކުރިމަތިލުންތަކުގެ އިތުރުން އިސްރާއީލު ހަނގުރާމައާ ބެހޭގޮތުން މަސްވަރާ ކުރެއްވި ނަމަވެސް، އެއްވެސް އާރުލާ އެއްބަސްވުމެއް ނުވަތަ ކުރިއެރުމެއް ލިބުނު ސިޔާސަތެއް އިއުލާނެއް ނުކުރެއެވެ. އަދި ދެ ފަރާތުންވެސް ބޮޑަށް ތަކުރާރުކުރީ ކުރިންވެސް އެ ގައުމުތަކުން ގެންގުޅެމުންދިޔަ ސިޔާސީ ވިސްނުންތަކެވެ.